تجربتي لحبوب ماكسي هير للشعر والأظافر

تجربتي لحبوب ماكسي هير للشعر والأظافر

 

 

 

 

 

اليوم بتكلم عن موضوع مرة مهم  للمرأة و مقوم من مقومات جمالها: الشعر
ليا تقريبا 3 شهور و أنا آخذ كورس حبوب لتقوية الشعر و الأظافر الشهير Maxi Hair

 

 



تجربتي لحبوب ماكسي هير للشعر والأظافر

 

 

طبعا كنت ناوية اكتب عن تجربتي فقط يعني انا لأيش استخدمته و هل نفعني أو لا لكن حسيت انه نسبة الفائدة حتكون مرة قليلة و تقتصر على "المنتج حلو انصحكم تاخذوه أو العكس" و أنا ما أسمح لنفسي آخذ دورك انتي أو دور دكتورك و انصحك بمنتج حيأثر في جسمك و خلاياه بحكم انه كبسولات مو مجرد كريم ينحط سطحيا فعشان السبب دا  الموضوع قررت انه يكون تفصيلي و توضيحي بس بشكل غير ممل عشان ما تحسي نفسك تقري في نشرة طبية و يتعمق مفهومك لمشكلة تساقط الشعر و تكوني انتي الحكم في اختيار العلاج اللي يناسبك. 
أولا حابة اوضحلكم طبيعة شعري من باب انه مو كل شي يناسبني ممكن يناسبك؛ شعري طويل لآخر الظهر ماشاء الله ، كثافته متوسطة يعني مو خفيف، فروة رأسي دهنية ، فيه لمعة حلوة بس لو اهملته كم اسبوع يسير باهت (هذا يبين اهمية العناية المستمرة) ، مشكلتي مع التساقط معقدة شوية شعري ما يتساقط بشكل كبير يسبب فراغات لا الحمد لله لكن كون الشعرة اللي تطيح طويلة فتكون مرة واضحة ليا لما اصفف شعري و يزعجني هذا الموضوع و خلاني ادور شي يقوي بصيلات الشعر عشان يحد من التساقط و يخلي الشعر اللي ينبت اقوى و صحي اكثر.
اللي كان المفروض اسويه هو اني اعمل تحليل دم (بوضح ليش بعدين) و اشوف لو محتاجة فيتامينات أو علاج ثاني لكن قراري كان في فترة انا عندي ضغط شغل كثير و ما عرفت أنظم وقتي ( ناوية اعمل تحليل دم خلال هذا الشهر و احكيكم عن التجربة)
فقررت اني أوقف مكملاتي الغذائية اللي استعملها و آخذ مكملات تكون مخصصة لتقوية الشعر و الأظافر و بدأت رحلة البحث ، و تحمست لماكسي هير بلاس من تجارب البنات الأجانب في الأنترنت و توكلت على الله و طلبته من النت. 

 

 

 

هل ممكن تعالجي تساقط الشعر بالفيتامينات؟

أتمنى محد يجيه إحباط بس الجواب هو لا ما في فيتامينات تعالج التساقط و شركات انتاج المكونات الغذائية ممنوعة قانونيا انها تسوق لمنتجاتها بعبارة " يعالج تساقط الشعر " ليش؟ لأن تساقط الشعر مو مرض هو مجرد مؤشر لحالة جسمك الصحية " الداخلية " يعني جسمك قاعد يتفاعل مع مشكلة داخلية و تساقط الشعر هو رسالة تنبيهية لوجود خلل داخلي أو تغيير في حالة جسمك لازم ننتبهلها و نعالجها. لو مشكلتك الداخلية هي نقص فيتامينات أو فقر الدم فوقتها الكبسولات بتعالجها و التساقط راح يخف أو يوقف بس لو مشكلتك الداخلية مختلفة ماح تنفعك و لازم تشوفي علاج للمشكلة الأساسية.
من الأسباب اللي ممكن جسمك ينبهك عليها عبر تساقط الشعر هي اختلال الهرمونات ( الحوامل غالبا يعانوا من التساقط في فترة الحمل ) أو استعمال علاج معين ( مثل الروكاتان ) أو مشكلة في الغدد الدهنية الخ. .في دي الحالات الفيتامينات ما حتساعدك أبدا.

طيب كيف أتأكد من سبب التساقط؟ لازم تروحي طبيب يعملك تحليل لمعرفة سبب التساقط و علاجه (و للأسف ثقافة اللجوء الى الطبيب عندنا ضعيفة جدا و دايما نسأل ناس مو متخصصين و نعمل من أجسامنا حقول تجارب لأي منتج عليه مدح و ما نروح للطبيب الا لما نجيب العيد).
 هذه بالنسبة للأسباب الداخلية أما الأسباب الثانية اللي لازم نحطها في بالنا هي أولا الوراثة ( مثلا لو كل اهلك شعرهم خفيف و يتساقط ) هنا صراحة مافي شي كبير ممكن تسويه لأنه مافي علاج آمن و فعال ممكن يتحدى الصبغة الجينبة في جسمك المسؤولة على تحديد صفات الأنسان كالطول و اللون و لون العينين و طبيعة الشعر و كثافته.
 و السبب الثاني هو عنايتك و تعاملك مع شعرك : تكرار الصبغة و الفرد و استخدام المجففات بكثرة و بدون حماية تضعف الشعر و تسبب تساقطه.

 اتمنى تكون النقاط اللي شرحتها لغاية الآن واضحة و نرجع لفيتامينات ماكسي هير. الفيتامينات توفر التغذية اللازمة لشعرك و أظافرك و حتا بشرتك و تخليها صحية و قوية بس لازم ما نعتمد عليها بشكل كلي و نحاول نحسن نظامنا الغذائي ,معروف انه الجسم يمتص الفيتامينات اللي تجيه عن طريق الأكل و يستفيد منها اكثر بكثير من اي فيتامينات تجيه عن طريق مكملات غذائية. فيتامينات ماكسي هير بلس فيها تركيز على الفيتامين B بجميع أشكاله ( B1, B2, B3, B5, B6 ) و أحماض ال فوليك ( B12 ) : كلها ضرورية لصحة الشعر و بصيلات الشعر و الجلد و تساعد صنع البروتينات اللازمة للشعر. كمان فيها جرعة عالية من البايوتين من أهم الفيتامينات المسؤولية على نمو الشعر و متواجد طبيعيا في صفار البيض، الكبدة، السالمون و الأفوكادو. ماكسي هير فيها كمان فيتامين A, فيتامين C, زنك و كالسيوم و فيتامينات عديدة مفيدة للجسم و مهمة للتفاعل مع مركبات الفيتامين B.

 هذه صورة لمكونات الماكسي هير بنسبها عشان تكون عندك فكرة عن الفيتامينات الضرورية لصحة البشرة و الشعر و الأظافر و حابة انبه انه لو تستعملي اي فيتامينات ثانية وقفيها عشان الجسم يخزن الفيتامينات الزائدة عن حاجته و لو ما استعملها ممكن تسبب مشاكل صحية توصل للتسمم لا قدر الله. كورس الشعر عادة يكون لمدة ستة أشهر.

 

 

 

تجربتي لحبوب ماكسي هير للشعر والأظافر

 

تجربتي مع ماكسي هير 

 ان شاء الله ما تكونوا طفشتوا من كمية المعلومات اللي في الموضوع بس و الله ضروري أوضح كل شي عشان الكل يستفيد و يفهم. أولا شعري من أول شهر لاحظت التساقط قل و سار يطلع لي بيبي هيرز كثير في مقدمة الرأس بالرغم انه من أول مو خفيف و الشي اللي ما توقعته انه شعري سار يطول بشكل اسرع ماشاء الله و قصيت اطرافه لاني ما احب طول شعري يتجاوز الظهر و الشعر اللي يطلع حسيته اكثر كثافة.
 مو عارفة لو الفيتامينات أثر في حالة شعري ( القديم ههه ) صراحة لأنه الشعر اللي ينبت و يطلع من الفروة هو عبارة عن خلايا ميتة ( لو خلايا حية ممكن تغذيها كان محد قص شعره من الألم ) فممكن نحسن مظهره بالعناية و الزيوت بس ما تقدري تعالجيه من جوا. بالنسبة للأظافر كانت اسرع شي شفت فيه التغيير، بعد اسبوعين ثلاثة سارت أقوى و ما تتكسر بسرعة. بشرتي للأمانة ما لاحظت تغيير كبير فيها ممكن عشان أساسا مرررة مهتمة فيها. بصفة عامة بعد ثلاث أشهر من استعمال ماكسي هير بلاس أنا راضية جدا عالنتائج و مبسوطة اني أخذتها و ناوية اكمل الكورس.

 أكثر سؤال شائع بخصوص المكملات الغذائية :هل هي تسمن؟ السؤال يضحك شوية صراحة لأن المكملات الغذائية ما فيها اي سعرات حرارية فمالها اي علاقة بزيادة الوزن و هذه معلومة خاطئة يقع تداولها في المواقع و المنتديات و صدقها الأغلبية.

والسؤال الثاني اللي ينسأل كثير هو هل حتكثرلي شعر جسمي؟

من خلال تجربتي صراحة ما أثر في شعر جسمي ووجهي أبدا بس عشان في بنات كثير اشتكوا من هالنقطة ( للأمانة عربيات في مواقع و منتديات فقط ما شفت المشكلة دي انطرحت في تجارب الأجنبيات ) حبيت أعمل بحث عالنقطة دي بالذات في مواقع طبية اجنبية موثوق منها و اللي وصلتله انه المكملات الغذائية مالها اي علاقة بزيادة شعر الوجه و الجسم للمرأة أساسا لأن شعر الجسم و الوجه العامل الوحيد المتحكم فيه بعد الوراثة هي الهرمونات و بالتحديد هرمون الذكورة التستوسترون و ليس للتغذية تأثير على شعر الجسم و الوجه. فعلميا ما في فيتامينات حتطلعلك بصيلات شعر جديدة في وجهك و جسمك و بالتالي ما حتسبب كثافة .ممكن و احتمال بسيط يخلي نموها اسرع بس ما حيكثفه هل دا الشي ممكن يؤثر على جلسات الليزر ما عندي فكرة صراحة أفضل تسألي دكتورك.

 طيب هل في سلبيات لاحظتها في الحبوب؟  صراحة في : أول شي الحبوب حجمها كبير و ريحتها مو حلوة أبدا :( أول ما فتحت العلبة و شميت الرائحة قلت مستحيل أستعملها. لكن ضريبة الجمال ضغطت على نفسي و اشربها مع عصير يضيع الطعم و الرائحة.

 شي ثاني أول يومين من الاستخدام كنت اتبع الارشادات اللي في العلبة مكتوب انه لازم أتناول 4 كبسولات في اليوم و حسيت بصداع مو طبيعي بالرغم اني ما غيرت شي في نظامي الا الحبوب وقتها قررت اني اسمع لجسمي و اخفف من الجرعة الى النص و الحمد لله راح الصداع و لا أثر في مفعول الفيتامينات عشان شفت نتائج حلوة.

 

 

 

تجربتي لحبوب ماكسي هير للشعر والأظافر



 

 

 

 

 

من فين اجيب الماكسي هير؟

هو للأسف ما ينباع في الصيدليات موجود في امازون أو iherb

 

اشوفكم على خير 💛💛💛💛💛💛💛